പച്ചിലമരുന്ന് കഴിച്ചവര്‍ കുഴഞ്ഞുവീണു മരിച്ചു;സംശയം തോന്നി സ്വയം കഴിച്ചുനോക്കിയ വൈദ്യനും മരിച്ചു.

പുനലൂര്‍  തമിഴ്നാട് തെങ്കാശിയില്‍ പച്ചിലമരുന്ന് കഴിച്ചു വൈദ്യനും രണ്ട് രോഗികളും മരിച്ചു. ഒരാള്‍ ഗുരുതരാവസ്ഥയില്‍. തെങ്കാശി സ്വദേശിയായ വൈദ്യര്‍ മുത്തുപാണ്ടി, അഴകപുരം വില്ലേജില്‍ ബാലസുബ്രമണിയന്‍, ഇരുതാണ്ടി എന്നിവരാണു മരിച്ചത്.
സ്വാമിനാഥനാണു ഗുരുതരാവസ്ഥയില്‍ തിരുനല്‍വേലി ആശുപത്രിയില്‍ ചികിത്സയിലുള്ളത്. ഇന്നലെ രാവിലെ ഒന്‍പതിനാണു സംഭവമെന്നു തെങ്കാശി പോലീസ് അറിയിച്ചു. പച്ചിലമരുന്നുമായി മൂത്തു പാണ്ടി കഴിഞ്ഞ കുറെ നാളുകളായി അഴകപുരം ഗ്രാമത്തിലെത്തുക പതിവാണ്. ഇന്നലെ രാവിലെയാണ് അദ്ദേഹം മരുന്ന് വിതരണം നടത്തിയത്. അല്‍പസമയത്തിനുശേഷം മരുന്ന് കഴിച്ചവര്‍ റോഡില്‍ കുഴഞ്ഞു വീണു.
ഇതോടെ മറ്റുള്ളവര്‍ വൈദ്യരെ വിവരമറിയിച്ചു.സംശയം തോന്നി വൈദ്യര്‍ മുത്തു പാണ്ടി തന്റെ മരുന്ന് കഴിച്ച്‌ നോക്കി.

മുത്തു പാണ്ടിയും ഉടന്‍ കുഴഞ്ഞു വീണതോടെ നാട്ടുകാര്‍ തെങ്കാശി പോലീസില്‍ വിവരമറിയിക്കുകയായിരുന്നു.